NOVAS

O GOBERNO SUPRAMUNICIPAL DO MORRAZO AUTÓNOMO RECORDA A OBRIGA DE SOLICITAR PERMISO PARA AS FOGUEIRAS DE SAN XOÁN

* O prazo está aberto desde este 11 de Xuño ata o día 20 para solicitar a correspondente autorización

O Goberno Supramunicipal informa da obrigatoriedade de solicitar autorización para poder facer fogueiras na noite de San Xoán.

O prazo remata o vindeiro 20 de Xuño.

O encargado de presentar a solicitude, que ten que ser maior de idade, farase responsable da fogueira e deberá indicar a localización exacta da mesma. As solicitudes están a disposición dos veciños e veciñas desde este 11 de Xuño no Local Sociocultural de san Martiño e sen este permiso queda completamente prohibido facer lume.

O obxectivo que se pretende “é levar un control de todas e cada unha das fogueiras que van estar activas nesa noite de San Xoán, para que se fagan en base ás normas básicas de seguridade e convivencia; tendo en conta que no noso territorio é habitual contar con máis de 100 lumes activos nesa noite”.

Normas de seguridade

No caso das fogueiras, terán que facerse sempre a máis de 15 metros de distancia de vehículos, árbores, fachadas, edificios ou calquera construción e nunca debaixo de liñas eléctricas. Nunca se deberán utilizar sustancias inflamables para prender o lume nin tampouco se poden botar papeis ou tecidos con pouco peso, xa que o aire pode levantalos e facer que inicien un lume incontrolado noutro punto.

Tampouco se deben botar pneumáticos, plásticos e outros elementos altamente contaminantes. E por suposto, unha vez rematada a festa é moi importante asegurarse de que o lume está completamente apagado.

Especial mención merecen os saltos nas fogueiras, que deberán realizarse con extrema precaución utilizando calzado e vestimenta axeitada, e sempre valorar as posibilidades de saltar segundo o tamaño da fogueira, así como as condicións físicas e a idade do individuo.

Lembrar que a colaboración cidadá resulta fundamental e que para calquera emerxencia cómpre chamar ao 112.
#gobernopromorrazo
#omorrazoautonomo